Geheim

Die baba bevat nie haar man se DNA nie, maar eerder haar man se beste vriend s’n. Die vrou wat pas gebel het, is nie sy sekretaresse nie, maar sy houvrou. Die rekening wat die bank gestuur het, is nie ‘n invorderingsfout nie, maar die bewys van die finansiële krisis waarin hy homself bevind.

Ek is nie goed met geheime hou nie. Ek beskou myself ook nie juis as die skinderbek van die kontrei nie, maar my grense van geheime is maar baie vaag. My vingers sal nie na Facebook wend om die nuus oop te vlek vir die wêreld om vinger te wys nie, maar om op te krop het ook nog niemand se lewe gered nie.

Ek het nie geheime van my man nie. Ek dink ek is net te deurmekaar om te onthou hoe en waar ek gelieg het oor iets. Hy is my klankbord. Hy is die stem wat my wispelturige humeur en temperament in toom hou. Hy is my rasionaal en diagonaal en logika as myne vir ‘n oomblik van lyn af gaan, op soek na nog ‘n verlore albaster of stukkie verlepte blaarslaai. As ek iets met hom bespreek, vertrou ek onvoorwaardelik dat die gesprek tussen ons sal bly… ‘n soort ongeskrewe term en voorwaarde wat elke dekade tussen ons gespan word.

Eintlik verstaan ek nie die sin en rede van geheime nie. Goed, ek weet hoekom ek nie my skaallesing op Facebook uitblaker nie… ek verstaan hoekom ek my pinkode moet bewaar… ek begryp hoekom eksamenvraestelle in die kluis toegesluit moet word… MAAR in my skamele ervaring op hierdie aardbol, het ek nog niks goeds sien kom van geheime nie. Geheime lei tot gevegte, egskeidings, prokureurs, steelfoto’s en drama, drama, drama. En op my eie is ek melodramaties genoeg, baie dankie.

Moet ook nie vir een oomblik ‘n geheim en ‘n verrassing verwar nie. Verrassings is wonderlik en positief vir alle partye. Verrassing word geskep met die mees opregte bedoeling en beste van intensies. ‘n Aap word egter uit ‘n mou gelaat oor die kat wat in die donker geknyp is, gou word ou koeie uit die sloot gegrawe en as jy jou oë uitvee, spat die stront. Slapende honde word almal eindelik wakker… so om hulle te laat slaap is ook nie die beste raad nie.

Ek soek nog na die geheim van ewige jeug, absolute geluk en die balans tussen selfsug en onbaatsugtigheid… en as ek dit kry, sal ek dit uitblaker, want sekere geheime moet eenvoudig gedeel word.

 

Advertisements

4 thoughts on “Geheim

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s