Strooitjie

Ek het nooit gedink dat ek sou opgewonde raak oor ‘n strooitjie nie. Maar vandag het ek ‘n adrenalien-aangedrewe entoesiasme ervaar toe die deurklokkie lui. Met ‘n paar spronge van opgewondheid het my 8-jarige dogtertjie, haar pakkie oopgeskeur. Daar was ‘n relaas oor die plastiek wat gebruik is om die strooitjies in te verpak, maar eindelik het sy die staalstrooitjies met ‘n reuse glimlag vasgedruk en toe in my handsak gaan bêre.

Sien, vir die afgelope paar maande word die aarde een klein treëtjie op ‘n slag gered. Ek moes (teen my wil) oor rotse langs die see gaan loop om die gemors op te tel. Daar word vir my gepreek as ek nie die papier en plastiek en glas in die regte herwinningsasblik gooi nie. Ons moet slimmer inkopies doen, met ons eie sakke. Elkeen het sy eie staal waterbottel, kosblikke is nou omgewingsvriendelik en ek moet die een You Tube video na die volgende kyk oor dolfyne en rommelhope…

Ek het eers gesug. Toe geglimlag oor haar ywerigheid. Nou is ek deel van hierdie span wat weier om by te dra tot die gemors wat die mensdom maak. Ek sal egter geen preek afsteek nie en Lehja moet nog leer dat dit nie goeie maniere is om jou opinie in ander se kele af te druk nie… ook nie ‘n strooitjie nie.

Elke jaar word byna 175 biljoen strooitjies oor die aarde weggegooi. Behalwe dat die vervaardiging van hierdie plastiek-suig-implemente Moeder Aarde laat snak na haar asem, is die probleem dat slegs 0,8% van strooitjies herwin word. Die res beland in die oseane, in rivierlope en op straat, waar diere die slagoffers van menslike afval word. En as ek nou eerlik moet wees: dis nie juis esteties aangenaam om na hope vuil strooitjies langs die snelweg te loer nie.

Wanneer het die homo sapien so lui geword dat jou lippe nie gebruik kan word om te sluk nie? Blykbaar is die eerste strooitjies reeds duisende jare gelede gebruik om die drank van die skifsel te skei. In Egiptiese hiërogliewe kan strooitjies gesien word. Maar dis 2018. Ons drink nie meer water wat uit ‘n put aangedra word nie. Ons teeblare word nou met oulike staalhouertjies vasgeknyp (of in teesakkies verpak). Hoekom die strooitjie? Want dit maak een of ander plastiekvervaardiger skatryk.

Kanada het plastiekstrooitjies in April 2018 verban. Talle restaurante het nou slim plaasvervangers begin gebruik… soos herwinbare papierstrooitjies en laaaaaang pastastrooitjies en selfs die kitskosreus, McDonalds is nou besig om projekte soos “the last straw” te ondersteun. Maar ons Jan Alleman se vertoë is eenvoudig: ag, wat gaan my strooitjie nou saak maak? Die probleem is dat 7 biljoen mense op aarde juis sò redeneer… en dan moet ek alweer ‘n video kyk van hoe ‘n plastiekstrooitjie uit ‘n seeskilpad se neusgat getrek word… en dan moet ek alweer ‘n 8-jarige Lehja se trane afvee… en dan moet ek alweer in die nag opstaan as my kind ‘n nagmerrie kry oor die eekhoring wat in ‘n stuk plastiek verstrengel geraak en versmoor het. Dalk het ek weke lank gesoek na staalstrooitjies vir selfsugtige redes: ek het my slaap nodig. En miskien het die wêreld meer 8-jarige hartjies nodig, wat onvoorwaardelik omgee oor die toekoms van elke lewende wese op hierdie blou planeet. Lehja, jy laat my deur ander lense na die lewe kyk. Jy is ‘n voorbeeld van hoe ons Moeder Aarde, op Moedersdag (en elke ander dag) moet hanteer. Ek salueer jou, staalstrooitjie in die sak.

 

 

 

 

Advertisements

4 thoughts on “Strooitjie

  1. Wow, respek!

    Wat my altyd tref is hoe selfvoldaan die meeste ouer mense is oor hulle kamtige wysheid, terwyl die werklikheid is dat ons by kinders soos joune moet gaan leer hoe om te dink en selfs hoe om ons te gedra.

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s