Na rus

Ek het ‘n vriendin wat hekel. Alles van babakombersies tot daardie poprokke waaronder jy ‘n rolletjie witgoud op die toiletbak kan wegsteek. As sy daai steekpen beetkry, word vingerfoute ondenkbaar en glimlag sy spontaan. ‘n Ander vriendin sing. Nie net in die stort nie, maar op die verhoog ook. Met elke noot wat sy netjies vasvat, blink haar oog so bietjie meer. ‘n Lawwe vriendin hardloop. Nie net om die blok nie, maar sy draf kilometers aanmekaar. Sy weet nie altyd waarheen nie, maar dis asof die afstand en tyd haar dryf om die een been vinniger voor die ander neer te plant. Sy doen dit nie omdat sy gewig wil afskud of gesond moet wees nie, maar omdat dit haar kop skoonmaak. Dit laat haar lekker slaap.

My boetie luister musiek. En speel kitaar. En tik kodes op ‘n komper. En soms drink hy ‘n bier as hy klaar kos gemaak het. Dan neem hy ‘n kiekie en ek weet hy ervaar vir ‘n oomblik berusting. My skoonsus karring tot die vetplantjie sy wortels vind. Sy lees die storie aan haar seun met onomatopoëtieka. En die feit dat ek daardie woord pas kon saamflans, gee my hoendervleis van lekkerkry. My skoonpa eet ‘n garnaal tot net ‘n vae gedagte agterbly. Skoonma voel gerus as sy na stemnotatjies van die kleinkinders luister. Pappa lees. Mamma drink wyn.

‘n Tannie kleur die fraaiste feëtjies in ‘n spektrum van skouspelagtigheid. ‘n Mevrou bak ‘n koek wat die gemeente se asem sal wegslaan, nie van die hoeveelheid brandewyn wat sy gebruik het nie, maar van die mooi. ‘n Oom bou ‘n seiljag met sy kaal hande, vir twee dekades lank, sonder ophou, sonder hulp. ‘n Tiener druk ‘n puisie tot hy teen die spieël ontplof. ‘n Bejaarde maak haar longe vir die laaste keer vol… en leeg. ‘n Meneer teken die egskeidingsdokument. ‘n Kind skets die reënboog. ‘n Weggooihondjie word aangeneem.

 

Soek jy steeds na die waters waar rus is? Drink ‘n koppie tee. Skryf ‘n gedig. Dans kaalgat in die sitkamer. Lees ‘n boek. Soek ‘n prentjie tussen die wolke. Skeer ‘n skaap. Vertel ‘n grappie. Vergeet jou selfoon vir ‘n dag by die huis. Brand ‘n kers. Doen. Net. Iets. Anders. Jou rus is waar jou vrede is. Jou vrede is waar jy glimlag. Jou glimlag is buite die boks van jou eie beperking. Gaan vang jou psalm.

Advertisements

5 thoughts on “Na rus

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s