Die oplossing

Ek het die wonderkuur gevind. Die persoon wat die verskil in enigiets op aarde kan maak. Jy hoef geen pil te sluk of geld te betaal nie. Jy hoef nie jou siel weg te gee, aan ‘n piramiedeskema deel te neem of Tupperware op Facebook te verkoop nie. Jy hoef nie skielik vir die Blou Bulle te begin skree of sokker te kyk nie. Jy hoef nie aan enige optog deel te neem, petisie te teken of jou e-pos adres op ‘n lys te skryf nie. Daar is nie ‘n maandelikse fooi, verpligte vergaderings of vrywilliglike orgaanskenking betrokke nie. Die oplossing vir elke probleem is hier beskikbaar: gratis, verniet, mahala.

Die wonderkuur kom in die vorm van ‘n mens. Hierdie persoon kan jou laat gewig verloor, uit die maag laat lag en jou spaargeld aanvul. Met klein bietjie fokus kan jy jou kwalifikasie verbeter, die beroepsleer klim, die bure gelukkig hou en boonop meer tyd hê. Hierdie wese het al die antwoorde en soek geen terugbetaling vir enige advies nie. Belowe. Cross my heart.

Kyk, ek sê nie jy gaan noodwendig van die antwoorde en oplossings hou nie. Dit gaan nie noodwendig maklik wees om in ‘n spoedige tydgleuf kan gebeur nie. Maar as jy hierdie wonderkuur waarlik aan jou kant kry, is byna niks onmoontlik nie. Jy hoef nie religieus te bid, enige Boek van Waarheid by die naam te kan noem of aan enige dominansie kollekte te voorsien nie. Hierdie entiteit vra nie taal, kleur, ras, kultuur, herkoms, aankoms of wederkoms nie.

So waar kry jy die antwoorde en inspirasie en motivering en oplossings? By die wonderkuur. En waar vind jy die wonderkuur? Maklik. In die spieël.

Advertisements

Komediant

Ek rol my oë vir die derde keer vandag. Eers was dit vir myself; toe ek tandapasta op die haarborsel wou sit. Toe vir my melodramatiese agtjarige; haar skoene sit glo so styf dat dit voel asof sy haar voet binne die volgende 18 minute gaan verloor. En nou vir Jeremy Mansfield wat reken dat Xander die twee meisies op Stella vermoor het, want Xander was ook ‘n jagter…

Soos ‘n wafferse Facebook-bekruiper neem Jeremy ‘n skermskoot van Xander waar hy twee jakkalse geskiet het. Die foto word nou wyd oor sosiale media versprei met ‘n lang relaas oor hoe jagters moordenaars is. Navorsing word aangehaal oor hoe meeste reeksmoordenaars ‘n geskiedenis het van dieremishandeling. En die mense gaan mal: Dis moord. Dis walglik. Dis afgryslik. Jeremy vir president!

Nee. Want al is die navorsing kolskoot, word die punt word gemis: jag is allermins dieremishandeling. En die ou wat diere mishandel met ‘n wapen, is nie ‘n jagter nie. Stropers is nie jagters nie. Poepholle wat duiwe met ‘n .22 skiet terwyl hulle brandwyn drink, is nie jagters nie. Jagters doen twee dinge: 1. hulle wil die dier so vinnig en pynloos as moontlik skiet (meestal om biltong te kan maak) en 2. hulle mors niks, alle vleis word gebruik. As hierdie twee reëls nie gevolg word nie, het jy nie met ‘n jagter te doen nie. My ervaring het my geleer dat jagters meer respek het vir die natuur as die vegetariër wat sy plastiekbottel by die kar se venster uitgooi.

Dan is daar kwessie van Xander wat jag. Hy het ook McDonalds geëet, Colgate shampoo gebruik en bier gedrink. Die outjie wat mense in Florida afgemaai het met ‘n automatiese geweer, se laaste maaltyd was ‘n Big Mac. Die seun wat sy ma met ‘n kombuismes opgekerf het in Engeland, se skouerlengte lokke het soos Colgate se appels geruik. En van die sewe plaasmoordenaars wat in April 2018 gearresteer is, was 6 poepdronk van bier. As jy die lyntjie wil trek, kan jy. As die skoen pas, kan jy hom aantrek. Maar hier word die baba saam die badwater uitgegooi. Wat van al die duisende jagters wat NIE mense moor nie? Wat van die dominees wat NIE met seuntjies peuter nie? Wat van die Blou Bulle wat NIE hulle vrouens slaan nie? Ons kan nie almal oor dieselfde kammetjie skeer nie… veral nie as die kammetjie pas Jeremy se boudhare gekam het nie.

Moordenaars skop dalk klein katjies en dalk eet hulle kitskos en dalk was hulle lank gelede geboelie… maar daar is ook moordenaars wat hoofmeisie was, kanker oorwin het, ‘n tuisnywerheid besit het, liefdadigheid by die ouetehuis gedoen het en president geword het. Moordenaars het nie ‘n te-doen lysie nie. En hulle CV’s lyk beslis nie dieselfde nie. Siek kom in verskillende vorme.

Xander is siek. Of dit ‘n versteuring is en of die siekte in die siel, gees of verstand is, weet ek nie, maar dat iets verkeerd geloop het vir Xander is ‘n feit. Hy gaan moet boet vir sy optrede, maar ek weier om die vinger na sy jakkalsjag te wys. Aikona. Jy is glo ‘n komediant, Jeremy. En radio-omroeper. En kosboekskrywer. Maar ingelig en logies is jy beslis nie. As hierdie die reseppie vir jou komedie is, wil ek maar net sê: kak grap.